.
Annunci online

tuppismierzu - il sito delle poesie in dialetto salentino
l'eu de Pasca
post pubblicato in Diario, il 13 aprile 2011
Pote essere de tanti culuri: giallu, russu, verde, marrone, puru biancu...
Tanti e diversi suntu li sapori: al latte, ciucculatu, culle mandorle...tutti bueni suntu.
La forma ete sempre uguale, ovale, a fiate se scascia subitu a fiate ete testu e tocca usi lu martieddhu....
Muti lu regalanu, autri se lu cattanu e poi lu lassanu marcire intra nu ripostigliu, autri se lu futtenu subitu subitu.
Li chiu golosi se nde cattanu puru doi, trete, quattru...poi ni enenu le carie alli tienti.
Certi lu offrenu pe beneficienza e certi se lu cattanu cu fanno n'opera bona!
Ma tutti quanti nui, lu sapimu, ca lu simbolu te la Pasca noscia ete l'eu,
rande, piccinnu, de tutte le misure e le grandezze, purchè cu bessa bonu!!!!


Tag inseriti dall'utente. Cliccando su uno dei tag, ti verranno proposti tutti i post del blog contenenti il tag. buona Pasqua!

permalink | inviato da tuppismierzu il 13/4/2011 alle 16:59 | Leggi i commenti e commenta questo postcommenti (0) | Versione per la stampa
pigghiare la vita tuttunutiru...
post pubblicato in Diario, il 12 aprile 2011


Ete comu nu sorsu te mieru, ca tocca se face tuttu na fiata sinnò lu sapore nu bete lu stessu,

Ete comu ci faci all'amore e te interrompi allu megghiu,

Ete comu se sta parli e ormai à pigghiatu lu iundulu e quarchet'unu te ferma allu chiu bellu e te scerri tuttu,

Ete comu quandu nu biti l'ura cu bai in vacanza e nu pienzi autru ca sulamente quiste tocca cu ncignanu lu prima possibile, e alla fine nu nci piensi pe nienti.

Ete comu quandu ncigni fuci cu rii prima te quiddhu ca ule te futte lu postu e ci rii dopu te ncazzi nu casinu.

Ete quandu sta faci na cosa e ci quarchet'unu te interrompe, pierdi lu filu.

Tocca vivi accussì, tutta na fiata, tuttu nu tiru, tutta na corsa, ma nu me dire ca poi se te fermi e te riposi nu te piace puru. La cosa ca conta ete ca ci te oti e guardi arretu, nu te penti propriu te nienti.



Tag inseriti dall'utente. Cliccando su uno dei tag, ti verranno proposti tutti i post del blog contenenti il tag. tuttunutiru

permalink | inviato da tuppismierzu il 12/4/2011 alle 14:26 | Leggi i commenti e commenta questo postcommenti (0) | Versione per la stampa
lu giurnu tantu attesu à riatu..
post pubblicato in Diario, il 25 ottobre 2010

Me pare ieri ca ulia cu minu la spugna e mollu tuttu quantu all'aria...

Paria ca sta meta mai putia bessere riata...e invece...

Oce qualche cosa à cangiata.
La dimostrazione ca la tenacia e la decisione toa sempre paga,

Sta storia tocca bessa de lezione pe mie e pe tutti quiddhi ca comu a mie ole lassanu perdere...

Percè intra la vita toa se uei cu rii a n'obiettivo sempre li dienti à stringere..

E l'obiettivo miu l'aggiu raggiuntu, oce finalmente à riatu!

E anzi face già parte dellu miu passatu.

Ma la cosa ca de chiui me inorgoglisce, ete

Ca tuttu cu le sole forze mie e grazie allu sostegnu de ci me ole bene aggiu fattu in modo oce cu ncete...

Ncete la consapevolezza ca quannu te impegni li risultati li ottieni se uei...

E ca aggiu datu na gioia grande soprattutto alli genitori mei...

Pe quistu au annanzi e nu me fermo aqquai cu riflettu per ore.....

Da oce tocca me chiamati tutti quanti ...Dottore!!!!
 

 


Tag inseriti dall'utente. Cliccando su uno dei tag, ti verranno proposti tutti i post del blog contenenti il tag. dottore

permalink | inviato da tuppismierzu il 25/10/2010 alle 14:10 | Leggi i commenti e commenta questo postcommenti (0) | Versione per la stampa
li sogni se potenu avverare...
post pubblicato in Diario, il 18 giugno 2010

Ncera na fiata nu vagnone ca sognava cu dienta qualcunu intra la vita.

Iddhu sognava quand'era piccinnu cu bessa na persona saggia e coscenziosa de quiddhe ca se sapenu far rispettare da tutti e ca  tutti iddhu rispetta.

Era lu 1998 quannu stu vagnone se iscrivia all'università, tantu buenu nu sapia la strada soa, ma li amici e li parenti tutti vicini n'hannu stati.

L'importante intra la vita toa cu tieni sempre cinca te sostiene e te ole bene,

La strada forse nu bè subito quiddha giusta, forse tocca sbagli cu mpari dalli errori,

ma la cosa ca conta de chiui ete cu rii agli obiettivi toi cu tanti sacrifici.

Oce, 2010, tanto tiempu ha passatu da dha fiata, eppuru stu vagnone oce tene nu sognu, ca ete quiddhu cu corona li obiettivi soi, tantu sofferti, tantu sudati, ca certe fiate à utu puru la sensazione ca nu ce la putia fare e lu desideriu folle cu molla tuttu.

Ma oce, lu traguardu ete chiù vicinu, e culla serenità e la serietà sape ca cullu tiempu e li sacrifici randi tuttu se pote ottenere!

Grazie a cinca à cridutu a stu vagnone, ca oce forse se pò dire ca à dientatu omu.

 




permalink | inviato da tuppismierzu il 18/6/2010 alle 19:29 | Leggi i commenti e commenta questo postcommenti (0) | Versione per la stampa
figghiu miu
post pubblicato in Diario, il 26 aprile 2010

Figghiu miu ieni aqquai ca lu sire tou na cosa t'a cuntare.

Me ricordu quannu era piccinnu ieu, ca la vita era china de sorprese e de spensieratezza. Quannu passava lu tiempu cu sciocu a pallone e sulu de quiddhu me mportava.

Quannu sinti nu vagnone nu sai ce bete ca tieni intornu, sinti nu pocu egoista e nu nte nteressa de nisciunu.

Te sienti liberu comu nu fringuellu e zumpi aqquai e addhai comu nu cardillu.

Perciò me raccomando figghiu miu, nu criscere mai, ca nu te nde ene nienti de megghiu.

Piensi ca quannu si rande tuttu se ndrizza e ca riesci cu soddisfi li sogni toi, ma nu sai ca la vita è tosta e tocca combatti contru tuttu e contru tutti.

Quannu capisci ce te sta cappa ete troppu tardi, e perciò piccinnu miu,

ieu te scriu ste parole cu te preparu a quiddhu ca ene.

Peccè a sapire quiddhu ca te tocca. Quistu ete n'avvertimentu cussi ca poi pigghiare le precauzioni e forse,

la vita toa pote essere megghiu de quiddha mia.




permalink | inviato da tuppismierzu il 26/4/2010 alle 18:10 | Leggi i commenti e commenta questo postcommenti (1) | Versione per la stampa
certi giurni..
post pubblicato in Diario, il 16 aprile 2010

Certi giurni ulia propriu cu mandu tuttu a dhù paise:

la fatia, li pensieri, li colleghi, la fammigghia e tutti quiddhi ca me stannu intornu.

Essu de casa  e ncignanu li uai:

Aqquai a Roma suntu tutti  scattati, annu tutti de pressa ca essenu tutti alla stessa ura la matina c'annu scire alla fatia e comu sempre fannu ritardu.

Iti le fimmene ca se truccanu intra le machine, li automobilisti  rraggiati ca sonanu comu li pacci, e li autisti te li bus ca nu se nde curanu se la gente sale o a scindere e bannu de pressa puru iddhi.

Se ria all'ufficiu già stanchi muerti ca pare ca à fattu la guerra.

Lu lavoru te dae pensieri, le persone nu te capiscenu e tocca te litichi ogne giurnu pe na cosa diversa e tieni puru li soliti problemi toi ca pe nienti se nde curanu.

Pare ca tuttu stae cu scoppia e te ene voglia de gridare ma poi cunti fino a 10. E te tocca sopportare.

Tuttu quistu e puru autru ca li uai pare ca nu spiccianu mai.

Ma menu male ca ncete na sula cosa ca te dae la forza cu bai annanti

Ete l'amore pe l'amore tou.

Ca te mbrazza forte forte quandu torni a casa ccisu

T'accarizza sutta le cuperte e te dae nu baciu ca te face riare in paraisu.

Menu male ca ncete iddha ca sennò comu facia?

Nu ia utu propriu chiù sensu l'intera vita mia!

 


Tag inseriti dall'utente. Cliccando su uno dei tag, ti verranno proposti tutti i post del blog contenenti il tag. certi giurni...

permalink | inviato da tuppismierzu il 16/4/2010 alle 19:52 | Leggi i commenti e commenta questo postcommenti (1) | Versione per la stampa
Sfoglia ottobre       
il mio profilo
calendario
rubriche
tag cloud
links
cerca